ADHOORI MOHABBAT ADHOORA MULK

 Adhura

1944 ki baat hai.

Yeh kahani azaadi se pehle ki hai. Do log jo ek dusre se mohabbat karte the, lekin desh ke batwara ki wajah se unki mohabbat puri nahi ho paayi aur saath mein dono par bahut zulm hua kyunki batwara ke time Hindu Muslim ko maar rahe the aur Muslim Hindu ko. Aur itna sab bas kuch kuch leaders ki wajah se hua tha, jis se do desh ban gaye. Toh chalo aage ki kahani hum iske zariye jaante hain, aage kya hua.

Lahore mein ek government college hua karta tha. Usme ek Kabir Sharma naam ka ladka apni study complete karne Amritsar se aaya. College ka naam kaafi tha, wahan par padhai achhi hoti hai yeh soch kar Kabir ki family ne usko wahan par bheja.

Kabir subah-subah hi college ki library mein jaake baith jaata.

Nadia Khan woh pehle se hi Lahore mein rehti thi. Woh bhi same college mein admission leti hai.

Kabir aur Nadia dono pehli baar library mein galti se takra gaye ek dusre se. Kabir ne galti se Nadia ki notebook utha li. Usne socha ki woh uski khud ki hai. Usne ghar jaake check kiya toh woh Nadia ki thi. Us par naam likha tha — Nadia Khan.

Agle din usne woh notebook de di. Nadia ne bina kuch bole le li notebook.

First meeting mein bas dono ke beech ye hi hua.

College mein normal hi group hua karte hain toh dono ek hi group mein the, jisme paanch aur log the. Shaam ko seedhiyon par baith kar chai peena, college ke baare mein baat karna, bas ye hi hota hai. Magar dheere-dheere dono ek dusre ki cheezon ko notice karne lage, jaise baat karne ka style. Kabir Nadia ki side leta aur Nadia Kabir ki. Shayad ek dusre ki cheez ko notice karna hi pyaar bola jaata hai kyunki dono ne aaj tak kabhi kuch nahi kaha. Ya shayad kisi ko kuch bolne ki zarurat hi nahi thi. Magar dono ko pata tha hum dono ek dusre se pyaar karte hain.

Bas aise hi dono ki life chalti rahi. Dheere-dheere dono ek dusre ke kareeb aana start kar diya, lekin ek dusre se kabhi kuch nahi bola, bas baat karte the.

1945 se 1946 aa gaya. Dono last year mein the.

February 1946, Kabir ki aadat thi woh khule aam bolta tha sab kuch. Usne Britishers ke khilaf protests karna start kar diya. Baaki logon ne bhi uska saath diya aur kaafi log uske saath judne lage. Ye cheez Britishers ko sahi nahi lagi, isliye Kabir ko ek deshdrohi ke jhoote ilzaam mein pakad liya.

Nadia ne ye sab kuch apni aankhon se khud dekha. Nadia ne koshish kari Kabir ko bachane ki, magar woh Hindu-Muslim ki wajah se wahi ruk gayi. Agar woh aisa karti toh Nadia ka poora khandan khatam ho jaata. Usne us time bas wahi khade hokar sab dekhna sahi samjha.

Pehle Kabir ko kuch time ke liye Lahore ki jail mein rakha gaya. Phir usko wahan se transfer karke Amritsar bhej diya. Ab case Hindustan mein tha, toh yahan par is case ko jhoota bata kar band kar diya.

Aur 1946 mein Kabir jab jail se bahar aaya toh usne dekha ki har taraf maar-maari ho rahi hai. Yahan ke log wahan bhaag rahe hain, wahan ke log yahan aa rahe hain. Isi beech Punjab ke do tukde ho gaye. Amritsar India mein reh gaya aur Lahore Pakistan mein.

Nadia Pakistan mein aur Kabir Hindustan mein.

1947 August, 14 tarikh ko Pakistan bana aur 15 ko Hindustan. Nadia ke Abbu ne decide kiya hum sab Lahore mein hi rahenge kyunki ye hamara ab asli mulak hai. Yeh sab sun kar Nadia dukhi thi, lekin woh apne Abbu ke aage kuch nahi bol sakti thi.

Nadia ne phir khat likhna start kiya Kabir ki yaad mein.

Usne likha ki woh jaanti hai tum begunah ho. Aur us khat mein likha tha ki agar main us din ek kadam utha leti toh pata nahi kya hota. Shayad situation kuch aur hoti. Mujhe nahi pata tum kahan ho, zinda bhi ho ya nahi.

Nadia ne khat likhna isliye start kiya kyunki woh nahi chahti thi ye baat bas uske mann mein hi reh jaaye. Woh chahti thi ye baat aur logon ko bhi pata chale.

Nadia Kabir ko ye khat bhejna toh chahti thi, magar uske paas na koi address tha na usko koi jagah pata thi. Usne khat apni diary mein hi daal diya aur almari band kar di.

Kabir ne bhi kabhi Lahore jaane ke baare mein nahi socha kyunki ab woh Pakistan ban gaya tha.

Kabir ne phir shaadi ki. Saalon baad shaadi. Ek achhi aurat — seedhi, samajhdaar. Pyaar hua usse bhi. Sachcha pyaar.

Magar kuch hissa, ek chhota sa tukda, woh hamesha Lahore ki library mein reh gaya. Us notebook ke paas jisme likha tha — Nadia Khan.

Kabir ne kabhi kisi ko yeh baat nahi batai.

Nadia ne bhi shaadi kar li thi kisi aur ke saath. Bache hue, naya sheher, naya ghar. Woh bhi apni life mein aage badh gayi thi.

But Nadia ne abhi woh khat apni almari mein hi rakha hua tha. Usne socha ki ek baar usko khol kar padhti hoon, lekin usne woh almari dobara band kar di.

Dono budhape mein mare. Lekin alag-alag zameen par. Ek Hindustan toh dusra Pakistan.

---

2024

Aryan Sharma ko apne Dada ke baare mein zyada nahi pata tha. Aryan ne ek din apne Dada se poocha ki aap kahan padhai karte the? Unhone kaha — main Lahore mein.

Dada ke jaane ke baad jab unka kamra saaf kar rahe the, unko Dada ji ka kuch purana samaan mila, jisme unki kuch photos thi, khaali safed kagaz aur ek purani diary.

Usme kuch likha tha, magar usme Urdu mein kuch likha gaya tha, Hindi mein nahi. Ab Aryan ko Urdu toh aati nahi thi. Usne photos dekhi. Us photo mein college ka naam tha.

Toh usne woh photo Google par upload karke check kiya toh usko confirm hua ki ye college Lahore ka hi hai.

Usne phir aur research kari. Jo diary thi usko internet par upload kiya.

Internet ke zariye se usko mili.

Zara Khan Karachi mein thi. Partition history par research kar rahi thi — PhD. Uski Nani ki kaafi cheezein uske paas thi, jo research ke kaam aati thi.

Internet par woh regular active rehti thi, regularly posts dekhti thi. Log kabhi-kabhi asli documents post karte the — letters, diaries, photos. Research ke liye valuable hota tha.

Aryan ki post dekhi. Scan download kiya. Pehla page khola. Pehle page par sirf ek line thi —

Nadia ke liye. Agar kabhi mile toh.

Zara ka haath thoda kanp sa gaya screen par. Uski Nani ka naam Nadia tha.

Usne Aryan ko message kiya. Formal — researcher ki tarah. Aryan ne aur cheezein share ki.

Zara ne apni Nani ki purani almari kholi. Diary mili. Andar ek khat tha, fold kiya hua.

Phir ek video call hua. Zara ne khat padha pura. Translate karte-karte ek jagah uski awaaz ruk gayi.

Aryan ne poocha — Kya likha hai?

Zara ruki aur phir padhna start kiya.

Unhone likha tha ki kaash woh us time par ek kadam aur aage aa jaati toh unko is baat ka poori zindagi bhar pachtawa nahi hota.

Dono ne is case ke baare mein zyada research karna start kiya. Phir unka decide hua ki hum dono ko milna chahiye hai.

Ek mahine baad dono Wagah Border par mile.

Aryan ne kaha — Dada ko nahi pata tha ki Nadia ne unhe yaad kiya tha. Poori zindagi.

Zara kuch nahi boli. Bas usne bola — Shayad ye pyaar dono ka adhura reh gaya hai.

Phir dono wapas aaye. Aryan Amritsar, Zara Lahore.

Zara ne us khat aur chitthi ki bhi research kari thi. Sab ko internet par upload kiya, taki aur log bhi is kahani ko padh paaye.

Kabir aur Nadia kabhi nahi mile.

 comicdarkfile