LANE NO 7

 THE BUTCHER OF LANE 7

Yeh story main aaj aap logo ko bata raha hoon kyunki mujhe lagta hai ki kuch cheezein sirf files mein band nahi rehni chahiye. Logo ke samne bhi aani chahiye.

Mera naam Rahul hai. Main ek crime journalist hoon. Yeh baat 2019 ki March mahine ki hai. Mere paas ek call aaya. Usne bas call par itna kaha, "Kanpur. Lane 7. Ek laash. Koi mark nahi, koi reason nahi."

Maine call ko itna serious nahi liya kyunki mere paas aisi calls aati rehti hain. Waise main us time Kanpur mein hi tha, toh maine us jagah jaane ke baare mein socha. Lekin woh ek normal jagah hi thi. Lane 7, choti-choti dukanein. Bachche school jaate hue, baaki koi sabzi le raha tha, koi kuch kar raha tha.

Lekin ek din, date thi 3 March 2019 ki. Subah MCD ka ek worker wahan se jaa raha tha jab usne ek aurat ko dekha jiski age lagbhag thirtie ke aas-paas thi. Uske kapde bilkul saaf the, bas woh zinda nahi thi.

Phir jab wahan par police aayi, uske baad forensic report mein Cause of Death: Unknown aaya aur SHO ne file band kar di. Keh diya heart attack hoga.

Lekin ek constable jiska naam Nikhil Rawat tha, usne us time ek cheez notice ki. Us aurat ke haath — dono — perfectly fold the. Aur jab kisi ki natural death hoti hai toh uske haath fold nahi hote.

Nikhil ka doubt confirm tab hua jab 19 March ko uske paas ek call aaya. Nikhil aur SHO investigation karne gaye toh uska doubt confirm hua.

Lane 7 par hi ek aur laash.

Uski bhi same condition. Na koi injury aur uske bhi haath pehle ki tarah seene par fold the. Bilkul same.

Aur ab SHO ne khud bola, "Ab case kisi officially serial killer ka lag raha hai."

Aur jo jagah pehle busy rehti thi, ab woh Lane No. 7 ekdam sunsaan si ho gayi. Log dukanein jaldi band karke chale jaate the.

Lekin Lane 7 par ek aurat rehti thi, Savitri Devi. Woh aunty jisne wahan par sab dekha tha. Unki age kuch 71 ke aas-paas thi. Unki aankhein kamzor thi lekin dimag tez tha.

Nikhil jab us area mein pochtaach karne gaya toh woh us aunty se mila. Usne unko bataya ki, "Beta, ek aadmi raat ko kabhi-kabhi aata hai. Woh bas walk karta hai. Na kisi se kuch bolta, na kuch kharidta. Bas logo ko dekhta hai aur chala jaata hai."

Nikhil ne poocha, "Kaisa dikhta hai?"

Woh boli, "Bilkul normal."

"Naam pata hai?"

"Naam toh nahi pata, lekin jab bhi aata tha white shirt pehen kar rakhta tha."

Nikhil yeh sab baatein sun kar ruk gaya kyunki usko yeh sab bilkul bhi normal nahi laga. Itni raat mein akela banda, bilkul white shirt mein aur akela kyun ghoomega? Yeh baat Nikhil ko kuch theek nahi lagi.

Aise dekhte-dekhte April se June aa gaya. Cases aur badh rahe the. Sab Lane 7 ke aas-paas. Sab same condition.

Aur phir 4th case mein forensic ne kuch discover kiya.

Forensic report mein aaya victim ki neck par ek micro puncture mark hai. Mark itna chhota ki pehli baar mein miss ho gaya. Aisa lag raha tha jaise kisi ne koi injection lagaya ho.

Dr. Meena Kapoor, jo forensic team ki head thi, unhone mujhe bataya, "Jo bhi yeh serial killer hai, uska koi medical background hai. Usko iske baare mein advanced knowledge hai."

Ek aadmi jisko medical knowledge thi, white shirt pehenta tha aur raat ko walk karta tha. Police ko abhi tak uske baare mein itna hi pata tha.

11 July ki raat ko Nikhil off duty tha. Lane 7 mein aise hi ghoom raha tha. Ek ghante baad usne kisi ko dekha jisne same white shirt pehen rakhi thi aur dheere-dheere walk kar raha tha.

In hi sab cheezon ko notice karte hue Nikhil ko us par shak hua toh usne uska peecha karna start kiya.

Walk karte-karte woh banda ek gali mein ghusa. Nikhil bhi uske peeche-peeche wahi gaya.

Gali khaali.

Aadmi gayab.

10 second baad Nikhil ke paas call aaya.

"Constable Rawat, apne ghar chale jao abhi."

Woh jaanta tha ki Nikhil uska peecha kar raha hai.

Nikhil ne next day uska number trace karwaya.

Naam tha Arvind Kumar.

Age — 38 saal.

Pharmacist.

Criminal record — koi nahi.

Na koi complaint.

Uske baare mein neighbours se poocha gaya toh unhone kaha, "Woh seedha-saadha aadmi hai. Akela rehta hai aur ekdam saaf kapde pehenta hai."

Uski jasusi ki gayi lekin teen din tak kuch bhi nahi mila. Toh SHO ne keh diya, "Galat aadmi hai."

Lekin Nikhil ne 8 whee din Arvind ko ghar se nikalte dekha. Wahi white shirt. Chhota bag.

Nikhil ne usko follow kiya.

Jaise hi dono Lane No. 7 par pahunche toh Nikhil ne dekha Arvind ek aadmi ke paas jaakar baith gaya aur usse baat karne laga.

Nikhil ne follow kiya.

Lane 7.

Ek sunsaan mohalla.

Ek aadmi bench par akela baitha.

Arvind uske paas gaya.

Baatein karne lage.

Normal lagta tha.

Kuch second baad Arvind ka haath us aadmi ke gale ke paas tha.

Usne ekdam se injection laga diya.

Yeh sab kuch usne itni fast se kiya ki jab tak Nikhil wahan par pahuncha, woh wahan se chala gaya.

Nikhil ne turant ambulance ko call ki.

Ambulance aayi.

Aadmi bach gaya kyunki Nikhil wahi par tha.

Kuch din baad Nikhil aur police team ne usko pakad liya aur court mein le gaye.

Arvind Kumar ne 9 murder accept kiye.

Judge ne poocha, "Tumne aisa kyun kiya?"

Arvind normally bola, "Maine kuch feel kiya tha jaise woh log apni life se pareshan hain, toh maine unko bas woh hi diya jo duniya unko nahi de sakti thi."

Judge ne yeh sab sun kar aur case ki files ko read karke Arvind ko ek psycho ka tag diya aur usko umar qaid ki saza ke saath mental hospital bhejne ke liye bhi bola gaya.

Aaj bhi Arvind Kanpur ki ek jail mein hai aur mental hospital se uska ilaaj chal raha hai.

Nikhil Rawat ko, jisne Arvind ke baare mein pata lagaya, usko sarkar ki taraf se medal diya gaya. Usko promotion bhi mila.

Ab woh ek Inspector hai.

Lekin kabhi-kabhi jab woh Lane 7 se nikalta hai, usko Arvind ki yaad aaj bhi aa jaati hai ki medical ka koi student aisa kaise kar sakta hai.

Case File CDF-2019-SK-004

Officially Closed.