VARDHAN HEIGHT( in hindi & hinglish)

VARDHAN HEIGHTS — 7th Floor CCTV Case File VH-2019

Mujhe pehle laga koi routine check hoga.

Phir maine file ka size dekha toh normal file ka size 800mb ka hota hai, magar is file ka size 4.7gb ka tha, aur ye ek raat ki footage thi.

Maine file open ki toh us file mein kuch aisa tha jisko dekhne ke baad main teen din tak so nahi paaya.

Background

Vardhan Heights. 12-manzil ka corporate tower hai. Sector 14 industrial zone ke bilkul andar — jahan bas raat ko trucks ke driver aur watchmen hote hain.

Building 2009 mein bani thi. Architect ka naam tha R.K. Seshadri. Inauguration ke 6 mahine baad unka accident ho gaya tha.

Security guard — Mohan Singh, 42 saal. 11 saal se same building mein kaam kiya karte the.

Us raat November 14 ko building mein sirf 4 log overtime kar rahe the. Third, fourth aur sixth floor pe.

Sab normal tha. Raat ke 10 baje tak.

10:03 PM

Ground floor par lift ekdum se ruk gayi.

Kisi ne koi button press nahi kiya tha aur koi andar bhi nahi tha.

Display flickered karta hai... aur direct 7 show karta hai.

Mohan guard room mein baith kar ye sab dekh raha hota hai. Woh ek second ke liye screen ko dhyan se dekhta hai. Phir usko kuch problem lagti hai toh woh supervisor ko call karta hai. Supervisor Mohan ko bol deta hai ki koi glitch hoga, ye bol kar call cut kar deta hai.

Ab apne aap hi lift ke doors open hote hain. Aur jabki andar koi nahi tha, par jaise Mohan lift ko check karta toh usme se ek smell aati hai jaise geele cement ki aur garam lohe ki, jaise koi wahan par construction ka kaam kar raha ho. But sabse hairan karne wali baat yeh thi ki ye building 10 saal purani thi.

Mohan ne apne register mein likha — "10:05 PM. Lift anomaly. Floor 7 displayed. Doors opened. No occupant."

Aur likhte likhte woh achanak ruk jaata hai. Phir slowly ek line aur likhta hai: "Building mein 7th floor nahi hai."

11:10 PM — Movements

Lift phir chalti hai.

Is baar lift ground se directly 7th floor pe jaati hai.

CCTV mein clearly dikh raha tha ki koi lift ke andar nahi hai. Na kisi ne koi button press kiya, na koi weight sensor — zero.

7th floor par jaate hi lift wahin ruk gayi aur doors open nahi hue.

Aur tabhi 6th floor ke corridor camera mein kuch dikhta hai.

Ek silhouette.

Blurry nahi — balki jaise camera ka sensor hi us jagah image process karne se refuse kar raha tha. Ek rectangular blank patch ban gaya... jo move kar raha tha.

Mohan apni torch uthakar stairs ki taraf badhta hai.

11:52 PM — Missing Floor

Jaise hi Mohan ne 6th floor cross kiya toh Mohan turant wahin ruk gaya.

Stairs apne aap continue hone lagte hain aur ek extra landing hai. Deewar par likha kaale paint se — No. 7

Mohan tight se railing ko pakad leta hai. Building ka blueprint uske dimaag mein hi tha kyunki usne 11 saal mein hazaar baar building ko dekha hai. 6th ke baad seedha 8th floor ka landing aata hai. Mohan jab usko dekh kar bolta — "Yahan sirf ek fire exit door hona chahiye."

Yahan ek poora floor kaise aa gaya?

Lights toh on thi par woh baar baar flicker kar rahi thi ek specific rhythm mein.

Ekdum se hawa thandi chalne lagi aur jaise jaise andar ja rahe the hawa aur thandi hone lagi.

Corridor ke end pe ek door tha.

Andar — 7th Floor

Usme koi furniture nahi. Bas grey walls aur doorless rooms, ek ke baad ek, jaise kisi ne floor toh ban liya ho bas complete karna bhool gaya.

Har step pe ek hollow sound aati thi — jaise floor ke neeche sirf hawa thi, koi structure nahi.

Mohan dheere se aage badhta. Torch ki roshni deewar par padti hai. Aur woh wahin ruk jaata hai. Deewar pe likha tha:

WE WERE ALSO SECURITY ONCE

Shift 1: Ramesh D. — 2009
Shift 2: Ajay Menon — 2012
Shift 3: Pradeep K. — 2014
Shift 4: ______

Fourth line — blank.

Lift ki bell bajti hai. Ding.

11:13 PM — Lockdown

Lift ka door khulta hai.

Mohan corridor mein jaata hai aur wahin ruk jaata hai.

Walls badal chuki thi. Ab saari walls par CCTV screens lagi hui thi.

Har screen pe Mohan khud tha.

Par footage mein woh alag-alag angle par tha — ek screen par woh abhi stairs chadh raha tha, doosre mein woh guard room mein baitha tha, teesre mein woh lift ke saamne khada tha.

Sirf delay nahi tha. Ye alag timelines thi. Ek saath.

Jaise hi intercom hota hai, awaaz aati hai — "Tum yahan naye ho."

Mohan ne reply kiya — "Tum kaun ho?"

"Jo yahan aata hai... woh floor ban jaata hai."

Koi jawab nahi.

Ek screen suddenly bright ho gayi.

Purana Footage

Date stamp: March 3, 2014.

Same corridor. Same flicker karti hui lights.

Ek guard khada hai, torch haath mein liye, same position mein jahan Mohan tha.

Pradeep K. bhi deewar dekh raha hai. Woh bhi intercom se baat kar raha hai.

Mohan sun sakta hai Pradeep ki awaaz — "Kaun ho tum?"

Aur phir... intercom se jawab aata hai. Mohan ki apni awaaz mein.

Final Truth

Mohan samajh jaata hai, par jab tak — bahut der ho chuki hoti hai.

Ye loop sirf record nahi karta. Ye replace karta hai.

Jo bhi guard wahan gaya — Ramesh, Ajay, Pradeep — woh us floor se kabhi wapas apne ghar laute hi nahi. Intercom pe jo bolta hai, woh wahi purane guards hain. Trapped. Aware.

Aur ab 7th floor ko ek nayi awaaz chahiye thi — jo agle guard ko 7th floor par bulaye.

Mohan ne jaise dekha ki lift ka door close ho raha hai, usne waise hi bhagna start kar diya.

But jaise jaise Mohan bhaag raha hota, waise hi corridor aage badhta rehta hai.

Sab jagah same door. Same grey walls. Same screens — ab sirf Mohan ka face, alag-alag expressions mein, sab ek saath.

Ek screen pe woh rota dikh raha tha.

Ek pe woh hans raha tha.

Ek pe woh seedha camera mein dekh raha tha. Aur apna sir hila raha tha.

Last Frame

Camera glitch.

3 second ka static.

Aur phir — clear footage.

Lift ke andar Mohan khada tha, ekdum shant.

Display — 7

Lift ka door close ho jaata hai.

CCTV Case File — Closing Note

Vardhan Heights ko November 15 ki subah seal kar diya gaya, short circuit ke naam par — electrical.

17 din baad reopen hua. Aur ab 7th floor officially building record mein tha. BMC files mein bhi. Architect drawings mein bhi. Jaise hamesha se tha.

Mohan ka koi record nahi mila. Na missing complaint. Na family contact. Employee file mein sirf ek line thi — "Resigned. November 14, 2019."

Building mein ab bhi night shift guard hote hain.

Par ek baat jo aaj tak kabhi kisi bhi naye guard ko nahi batayi jaati —

First night jab woh guard room mein akele baithe hote hain, intercom par call aati hai. Aur jaise hi woh call pick karte hain, wahan se awaaz aati hai —

"Tum yahan naye ho."

Warning

Agar kisi building mein lift bina button press ke 7th show kare, aur andar se cement aur lohe ki smell aaye —

Toh mat jao.

Woh floor tumhara wait kar raha hai.

Yeh ek kaalpanik horror kahani hai. Isme diye gaye sabhi naam, case file numbers aur events kaalpanik hain.