WARD NO7 ( in Hindi & hinglish)

Ward No. 7 — Rampur Government Hospital Haunted Case

Ward No. 7 ek Hindi horror story hai — Rampur ke band government hospital mein Ward No. 7 aur ek lapata bacche Rajan Mehta ki kahani, jo ek journalist ki nazar se batayi gayi hai.

Ye meri khud ki story hai jo maine khud feel ki thi. Maine abhi tak kisi ko nahi bataya, bas is article mein likh kar bata raha hoon — kyunki kuch din pehle mere saath aisa hua jo mujhe ab chain se rehne nahi deta hai.

2019 Ki Shuruaat

Main us time ek local news channel ke liye kaam karta tha — ek din mujhe ek tip mili ki Rampur ke purane government hospital ki, jo 2011 se band tha, wahan raat ko kuch dikhai deta tha, jaise koi rehta ho wahan par. Toh main ye baat soch kar wahan gaya ki agar main wahan jaake story banaun toh woh viral hogi.

Toh wahan par hum teen log gaye — main, mera cameraman Salim, aur ek local ladka Deepu jisko wahan ka rasta pata tha. Raat ke 11 baje hum andar gaye. Wahan ki deewarein tooti hui thi, tiles bhi saari tooti hui thi, aur waisi hi smell aa rahi thi jaise kisi purani building mein hoti hai.

Ground floor normal tha. Creepy lekin normal.

Ward No. 7 Ka Raaz

Phir Deepu ne upar ki halat dekhi toh usne wahan jaane se mana kar diya.

Phir unko peeche se awaaz aayi jaise wahan par koi nahi hai, aur usne bola ki Ward No. 7 mein mat jaana.

"Ward No. 7 hai upar. Wahan mat jaana."

Hum log phir bhi upar gaye.

First floor aaya. Dono side rooms, sab ke door open the — sirf ek band tha, end mein. Uspe likha tha — Ward 7.

Salim apne camera se recording kar raha tha. Sab normal lag raha tha — jab tak Salim ne mujhe headphone nahi diye.

Camera ki audio mein baar-baar ek awaaz aa rahi thi jaise koi continuous counting kar raha ho.

"Teen... chaar... paanch..."

Hum dono wahin ruk gaye aur kaanon se kuch suna nahi jaa raha tha, magar camera ke audio se awaaz saaf aa rahi thi jaise koi abhi bhi counting hi kar raha ho.

Deepu neeche hi tha toh usne zor se chilla kar kaha ki bhaago upar se, aur main Ward 7 mein hi tha.

Purani File Ka Raaz

Purane beds, sab jagah dhool mitti, ek ulta gira hua drip, bed pe — ek purani file.

Patient file. 2009 ki. Naam — Rajan Mehta, age 8.

Bacche ki file thi. Maine uthayi. Last mein likha tha —

"Patient absconded. Ward locked. Case closed."

Matlab baccha bhaag gaya, phir uske baad ward bhi band kar diya tha aur case ko khatam kar diya.

Lekin khatam hua?

Camera Band Hone Ke Baad

Wahan se nikalte time — corridor mein — Salim ka camera achanak band ho gaya. Battery full hone ke baad bhi camera band ho gaya.

Aur tab humne suna. Apne kaanon se.

Wahi ginti. Ward ke andar se.

"...chhe... saat..."

Hum direct bahar bhaage. Deepu toh pehle hi nikal gaya tha.

Research Aur Sach

Agle din maine hospital ke baare mein research ki. 2011 mein band kyun hua?

Ek article mila — local akhbaar ka, 2010 ka.

Government hospital se 8 saal ka baccha lapata ho gaya tha. Usko 3 hafton tak dhoonda, woh nahi mila.

Naam — Rajan Mehta.

Woh kabhi mila nahi. Aaj tak nahi.

Maine footage dekhi baar baar.

Last frame mein — andheron mein — ek chhoti si ungli khadi hui thi bas, haath mein kuch nahi tha.

Apni ungliyaan gin raha tha.

Salim Ka Call

Yahan tak toh mujhe pehle se hi pata tha.

Lekin 3 din pehle jo hua tha, main woh nahi jaanta tha.

Salim ka phone aaya. Raat ke 2 baje. Aur woh ro raha tha.

"Yaar... mere ghar ke bahar... corridor mein... koi khada hai. Ek chhota baccha sa. Main usko CCTV mein dekh raha hoon."

Maine kaha — "Police ke paas call karo."

Usne kaha — "Yaar... woh counting kar raha hai aur meri ungliyon ki side dekh raha hai..."

Phir achanak call cut ho gaya.

Maine kam se kam usko 40 baar call kiya, magar usne nahi uthaya.

Salim Lapata

Subah main Salim ke ghar gaya toh uska ghar band tha. Padosi ne bataya ki woh raat ko hi nikal gaya tha apna bag lekar.

Salim aaj tak nahi mila.

Aakhri Raat

Aur kal raat —

Maine bhi apne ghar ke bahar kuch dekha tha. Aur awaaz aayi. Aur phir achanak se sab band ho gaya.

Aur main ye isliye likh raha hoon kyunki agar main kal nahi raha — toh kisi ko toh pata rahe ki —

Ward No. 7. Rajan Mehta. 2009.

Woh abhi bhi counting kar raha hai.

Yeh ek kaalpanik horror kahani hai. Isme diye gaye sabhi characters aur events kaalpanik hain.