Yahan Maa Ka Haq Hai, Tera Nahi | Ek Khaufnaak Hindi Horror Story

Meri Beti Ne Aaj Mujhse Pucha — Papa Woh Aurat Kaun Thi Jo Kal Raat Mere Saath Soti Rahi

Ek Ajeeb Sa Sawaal

Pure ghar mein aur meri beti rehte the bas. Meri beti ka naam Mishka hai. Meri beti 6 saal ki hai, toh ek din jab hum dono saath baith kar nashta kar rahe the, usne achanak se mujhse pucha ki "Papa, woh aurat kaun thi jo kal raat mere saath mere room mein so rahi thi?"

Main khate-khate ekdam ruk gaya aur maine usse pucha, "Beta, kya matlab hai aapka is baat se? Hum dono ke alawa toh ghar mein aur koi rehta hi nahi hai."

Par Mishka ne bataya ki us aurat ne bola tha, "Beta so jao aaram se," toh main so gayi aur jab main subah uthi thi toh koi nahi tha wahan par.

Maine uski baat itni serious nahi li, kyunki aksar aise sapne aate hain chhote bachon ko jo woh sach maan lete hain.

Next Night

2 saal pehle Mishka ki mummy — Priya — ek accident mein mar gayi thi. Yeh baat highway ki hai, NH-8 par. Uss din raat ko jab mere paas police ki call aayi toh mujhe unki baat par bilkul bhi vishwas nahi hua tha ki aisa bhi kuch ho sakta hai. Hamari ek hansti-khelti family us din barbaad ho gayi.

Uss din ke baad se maine Mishka ko akele sambhala. Agar woh kabhi puchti apni mummy ke baare mein toh main bol deta, "Maa kahin gayi hai, bahut door."

Next day maine Mishka se pucha, "Woh aurat kaisi dikhti thi?"

Mishka ne meri taraf dekh kar bola ki woh bilkul maa jaisi dikhti thi.

Next Day Jo Maine Dekha

Uss raat main office se late aaya tha toh main direct Mishka ke room mein gaya usko dekhne. Woh so chuki thi. Light wagirah sab band karke main apne room mein wapas aaya aur CCTV check karne laga, kyunki maine Priya ke jaane ke baad Mishka ki safety ke liye ghar mein camera lagwaye the.

Maine woh raat ki recording dekhi.

Raat ke karib 2 baj rahe the. Maine dekha ki Mishka ke kamre ka door thoda open tha, lekin koi andar nahi gaya. Uske baad maine dekha jaise Mishka ki blanket khud-ba-khud ek taraf khiski. Jaise koi let gaya ho.

Aur Mishka — jo akeli so rahi thi — usne karwat li aur uske paas khisak gayi. Jaise usse pata tha koi tha uske paas.

Recording mein koi nahi tha.

Woh Aayi Phir

Next morning Mishka ne mujhe bola ki "Papa maa phir aayi thi aur unhone bola hai ki aapka dhyan rakhne ke liye."

Raat ko maine khud Mishka ke kamre ke bahar baithne ka decide kiya. Poori raat.

Raat ko Mishka ke kamre se awaaz aayi jaise koi gaana gaa raha ho. Bilkul waise jaise Priya gaati thi Mishka ke liye.

Jab maine woh awaaz suni toh mere rongte khade ho gaye.

Main andar gaya.

Kamra khaali tha.

Mishka so rahi thi. Muskura rahi thi neend mein aur kamre mein se bas Priya ke woh perfume ki smell aa rahi thi jo woh lagati thi.

Maine Priya ki kuch cheezein ek almari mein rakhi hui thi. Main usko nahi kholta tha. Kholte hi mujhe uski yaad aane lagti thi.

Lekin us raat maine himmat karke kholi. Sab kuch wahi tha. Saare kapde, photos, ek diary.

Uski cheezon mein kabhi haath nahi lagata tha bina usse puche, lekin us din maine uski diary kholi.

Maine padha.

Aakhri entry — accident se ek din pehle —

"Agar main kabhi na rahi toh Mishka ko batana — maa hamesha rehti hai. Sirf form badal jaata hai."

"Aur Arjun ko batana — NH-8 se mat jaana kabhi. Woh road mujhe pasand nahi. Kuch hai wahan."

NH-8 Ka Sach

Diary ko padhne ke baad maine report dobara dhoondhi jo police station se mujhe mili thi 2 saal pehle.

Report mein likha tha raat ka time tha. Priya ki car ke paas bas ek truck tha. Na koi animal, na koi doosri car aur road bhi bilkul clear tha.

Witness bas ek truck driver tha jo Priya ki car ke peeche tha.

Usne bataya tha ki Priya ki car achanak ruk gayi. Phir driver side ka door khula aur car off-road chali gayi.

Door khud khula tha.

Maine truck driver ka number dhoondha. Khud call kiya.

Woh pehle baat nahi karna chahta tha. Phir bola, "Bhai, main aapko sach bolunga. Uss road par beech mein koi khada tha. Aisa laga tha ki koi aurat hai. Aur Priya car se utar kar uske saath chali gayi. Ab iske aage maine kuch nahi dekha. Main bhi us hadse ke baad us road par nahi gaya."

Mishka Ka Sawaal

Agle din Mishka ne ek drawing banayi.

School mein teacher ne mujhe call kiya, "Aapki beti ne kuch ajeeb banaya hai. Aap aa sakte hain?"

Main school gaya aur maine dekha drawing mein ek aurat thi, ek bachi thi aur bhi kuch bana tha — dark sa, bina face ka.

Teacher aur maine pucha, "Mishka beta, yeh kaun hai?"

Mishka ne bola — "Woh jo maa ko lekar gayi thi. Lekin maa kehti hai ab woh nahi aayega. Maa ne usse bhaga diya."

Aakhri Raat

Uss raat mujhe aisa laga tha ki jaise ghar mein kuch hai. Alag sa tha. Jaise kuch bhari sa ho.

Uss raat main so bhi nahi paya.

Mishka ke room se awaaz aayi.

"Is baar yeh galti nahi hogi."

Maine khud woh awaaz suni aur yeh awaaz Priya ki nahi thi.

Main ekdam se andar bhaga.

Mishka apne bed ke corner mein simti hui thi. Darr hui.

"Papa, woh aa gaya."

Kamre mein cold spot tha. Bilkul ice jaisa.

Aur tab Mishka ne apna haath uthaya aur us kone ki taraf ishara karke bola — "Maa ne bola tha agar woh wapas aaye toh usko yeh bolna."

Mishka ne kuch bola tha dheere se awaaz mein jo maine suna nahi.

Aur cold spot bhi ek second mein gayab ho gaya. Jaise kuch wahan par tha hi nahi.

Next morning maine Mishka se pucha ki "Beta, raat ko kya hua tha?"

Usne muskurate hue kaha — "Maa ne bola tha — agar woh aaye toh kehna: Yahan maa ka haq hai, tera nahi."

Maine aankhein band ki.

Mujhe laga ki Priya 2 saal baad bhi apni beti ki raksha kar rahi thi.

Jo Main Aaj Jaanta Hoon

NH-8 par jo tha, woh Priya ko nahi le gaya.

Priya ne khud choose kiya uske saath jaana apni beti ko bachane ke liye.

Woh aur jo cheez Mishka ko lekar jaana chahti thi, woh aaj bhi usko yeh karne ke liye try karti hai, lekin har baar uski maa usko bacha leti hai.

Aur mujhe ab poora vishwas hai. Priya jab tak hamare saath hai, tab tak Mishka ka koi kuch nahi kar payega. Uski koi jagah nahi yahan.

Main aaj bhi Priya ke perfume ki bottle open karke rakhta hoon taaki usko lage main jaanta hoon ki Priya hamare saath hai.