Khaufnaak ghar hindi & hinglish horror story

Woh Ghar Jisme Deewarein Saans Leti Thi

Ek Khaufnaak Hindi Horror Story

UP mein zila Meerut naam se, wahi per, Meerut se thodi door ek chota sa gaon hai Rajpura naam se. Waha per ek gali hai number 13 naam se, waha ke log aaj bhi us gali mein jaane se darte hain. Ese hi us gali mein ek ghar hai, na toh koi us ghar ki taraf dekhta hai aur na us ghar mein jaata hai. Lekin yeh kahani us ghar ki nahi hai, yeh kahani us parivar ki hai jo aakhri baar is ghar mein rehne aaye the.

Naye Ghar Mein Shift

Yeh baat 2019 ki hai jab ek family Delhi se Rajpura shift hue. Family choti si thi, bas 3 log — husband, wife aur unki ek beti. Husband ka naam tha Rohan, aur uski patni Priya, aur beti Ishita, jo bas 8 saal ki thi.

Rohan Rajpura shift is liye hua tha kyunki usko waha per school mein teacher ki job mili. Aur abhi Rohan ki nayi-nayi job thi, usko paison ki problem thi, jiski wajah se usko ek sasti hi property chahiye thi rehne ke liye. Toh woh ussi 13 number gali mein gaya, waha per usne woh ghar dekha aur usko pasand aaya. But dealer ne Rohan se ek baat ki — "Sahab, ghar thoda purana hai, par bilkul sahi hai. Bas raat ko upar wale kamre ka darwaza band rakhiyega." Rohan ne us time woh baat bas haske taal di, usne dealer ko bola ki aise purane gharon mein aisi baatein toh hoti hi hain. Ab puri family waha per shift ho gayi.

Pehle hafte toh sab normal hi tha, lekin ek ajeeb cheez thi — ghar ki deewarein hamesha thandi hi rehti thi, chahe bahar kitni bhi garmi ho. Priya aur Rohan ne is baat ko itna seriously nahi liya. Rohan ko laga ki aisi purani building hai toh is wajah se hota hoga, wahi Priya ko laga fan ki wajah se ho raha hoga. Ek baat aur — us ghar mein se ek purani gandi si mehak bhi aati thi, aur aisa nahi hai ki yeh ghar saaf nahi hua tha. Priya aur Rohan ne shift hone se pehle isko achhe se saaf kiya tha, lekin phir bhi iski smell nahi gayi. Rasoi mein jo bartan rakhe rehte the, woh bhi apni jagah se hat jaate. Jo bartan table par rakhti, woh usko almari mein milte, usko yakeen toh nahi hota tha, lekin aisi chhoti-chhoti baaton ko unhone naye ghar ki adjustment problems samajh kar ignore kar diya, jaisa har nayi jagah mein hota hai.

Ishita Ka Sawaal

Rohan ki beti Ishita ka room seedhiyon ke paas hi tha, uske room se woh darwaza saaf dikhta tha. Toh ek raat Rohan jab usko sulaane gaya, toh usne poocha ki "Papa, jo upar room hai, waha per kaun rehta hai?" Rohan ne bola ki "Beta, waha koi nahi rehta hai, bas ek storeroom ki tarah use hota hai." Lekin Ishita ne jawab diya ki "Phir Papa, phir woh mujhe kyun dekh rahi thi us raat?" Lekin Rohan ne uski baat par dhyan nahi diya, usne Ishita se bas itna kaha ki "Beta, upar koi nahi hai, aapko bura sapna aaya hoga zaroor."

Lekin doosre hafte se sab kuch badal gaya.

Ishita raat ko rone lagti, roz raat teen baje, wahi time har baar. Priya jab bhi usse poochti "Kya hua beta?" toh Ishita bas ek baat bolti — "Woh aunty mujhko phir se bula rahi thi.

Woh Khula Darwaza

Starting mein Rohan aur Priya ne socha koi bura sapna hoga, ya nayi jagah hai, akeli sondi hai raat ko, is liye aisa ho raha hai uske saath.

Lekin ek raat Priya khud teen baje neend se uthi, kisi ne uska naam liya tha — "Priyaaa..." Ussi time Priya ne Rohan ko uthaya aur usko bataya ki "Kisi ne mujhko awaaz di." Rohan ne kaha "Bahar se koi awaaz de raha hoga." Dono ne ignore kiya, lekin Priya jab bathroom jaane lagi toh usne dekha jo upar room hai, uska darwaza toh hamesha band hota hai, lekin us time woh khula tha aur andar se ek thodi-thodi roshni bhi dikh rahi thi. Rohan neeche soon raha tha, lekin Priya ko yeh dekhna tha ki woh roshni aa kaha se rahi hai, toh Priya dhire-dhire upar wale kamre mein pahunchi, usne gate khola. Ab jaise hi gate khula toh usne dekha kamre mein andhera tha, lekin kamre ke beech mein ek purani kursi rakhi thi, gandi si, aur thodi der baad woh apne aap hilne lagi.

Priya darr ki wajah se us room se bhaagi aur apne aap ko yakeen dilaya ki aisa kuch nahi hai, yeh neend mein hone ki wajah se dekh liya hoga.

Sharma Aunty Ki Kahani

Next day Priya market gayi toh waha per uski jaan-pehchaan ek aunty se hui, woh 12 number gali mein rehti thi, lekin unko sab pata tha us ghar ke baare mein. Toh unhone Priya ko apne ghar bulaya chai ke liye, Priya chali gayi. Priya ke saath jo hua, woh baat usne Sharma aunty ko bataayi. Aunty ka chehre ka colour ek dam se badal gaya, jaise woh darr gayi ho. Aur dheere se boli — "Beta, woh baatein karne layak nahi hain, lekin tum log waha rah rahe ho toh jaanna zaroori hai." Unhone Priya ko bataya bahut time pehle ek aurat, jiska naam Kamla Devi tha, woh yaha par apni beti ke saath rehti thi. Lekin uski beti mar gayi bimari ki wajah se, iske phir kuch mahine baad Kamla Devi ne bhi apni jaan de di thi, latak kar. Ek hafte tak yeh baat kisi ko nahi pata chali, kyunki us side koi jaata hi nahi tha. Phir jab logo ko pata chala toh puri basti mein sannata ho gaya. Is accident ke baad log kehte hain Kamla Devi aaj bhi apni beti ko dhoondhti hai, aur jab bhi ghar mein koi chhoti bachchi aati hai, woh use apni beti samajhne lagti hai. Kai parivar pehle bhi aa chuke the aur sab ek hi wajah se bhaag gaye the. Ab Priya ko dhire-dhire samajh aane laga tha ki Ishita kyun roti thi raat ko aur aisa kyun bolti thi ki "aunty mujhko bula rahi hai." Sharma aunty ne yeh bhi bataya ki jo-jo parivar waha per rehte the, unki choti bachchi raat ko gayab ho jaati thi aur subah usi band kamre mein milti thi. Sharma aunty ne unko yeh bhi bataya ki Ishita bilkul same Kamla Devi ki beti ki tarah dikhti hai, same height, same age. Yeh sunkar Priya aur tension mein aa gayi.

Woh Raat Jiska Darr Tha

Ab yeh sab kuch Priya ne Rohan ko bataya, toh dono ne decide kiya ki us raat ko woh ghar chhod denge, lekin unko subah tak ka wait karna hi tha kyunki itni raat ko koi taxi nahi milti thi us area mein. Ab ussi raat jiska darr tha, woh hi hua — Ishita apne bed se gayab thi. Aur theek 3 baje Priya yeh dekhte hi tez se chillayi, aur jabhi Rohan bhaagte hue upar gaya.

Gate khulte hi usne dekha Ishita ussi purani chair par baithi hai, uski aankhein band hai, lekin woh bas muskura rahi thi. Priya ne usse poocha "Ishita, tum kaha per kaise aayi?" Ab Ishita ne jawab diya ki "Maa mujhko bulaya, aur mujhko laga jaise yeh awaaz aapki hi hai, main isliye upar aayi." Ishita ne apna haath uthaya aur neeche side kiya, jaise woh kisi ko bol rahi hai ki waha per koi khada hai. Ab yeh sab dekh kar Priya aur Rohan dono ghabra gaye ki yeh kya ho raha hai humare saath aur humari beti ke saath, woh toh abhi bas 8 saal ki hai. Ab Ishita ne bola ki "Maa, mujhko koi dikh raha hai waha per," jaise ki koi neend se jaag raha hai.

Woh Purani Tasveer

Ab itna sab hone ke baad Priya aur Rohan Ishita ko lekar jaa rahe the, toh Priya ne ek photo dekhi, aur woh photo aur koi nahi, Priya ki khud ki bachpan ki photo thi. Yeh dekh Priya ka dimaag ek dam se ghoom gaya ki Priya ki bachpan ki photo waha per kaise aayi. Ab yeh baat Priya ne Rohan ko bataayi, lekin Rohan ne bola "Iske baare mein baad mein baat karte hain." Ab woh dobara se Delhi shift ho gaye, lekin kuch hafton ke baad Rohan ko apne doosre ghar mein ek phata-purana photo mila, aur yeh photo kisi aur ka nahi, Priya ka hi tha — Priya ke bachpan ka, jisme uski asli maa ka chehra tha. Priya ko chhote mein hi god le liya gaya tha, jab uske biological parents ek accident mein mar gaye the. Us photo mein Priya ki maa ka chehra bhi tha, jisko dekhkar Rohan ke haath kaanp gaye. Wahi chehra tha jo Sharma aunty ne unhe dikhaya tha — Kamla Devi ka.

Ab Priya aur Rohan ko yeh jaanna tha ki Priya ki asli maa kaun hai — Kamla Devi ya jinka accident ho gaya tha. Woh ab dono ussi jagah par gaye jaha se Priya ko adopt kiya gaya tha. Phir Priya ko pata chala ki usko bachpan mein Rajpura se gayab kar liya gaya tha. Tab usko pata chala ki uski asli maa aur koi nahi, Kamla Devi hi thi, aur logon ne Kamla Devi ko bataya tha ki uski beti bimari se mar gayi. Itna sab jaanne ke baad Priya rone lagi tez-tez, ki "Woh meri maa hai," jisko yeh bhi nahi pata tha ki uski beti zinda hai. 30 saal se bas woh ek aatma banke ghoom rahi thi aur mera intezaar kar rahi thi. Woh har us bachchi mein mujhko dhoondti jo bhi us ghar mein aati thi. Aur ab usko yeh bhi nahi pata tha ki uski asli beti khud maa ban chuki hai itne time mein.

Aaj Bhi Woh Ghar Khali Hai

Aaj bhi Priya kabhi-kabhi raat ko teen baje uth jaati hai, aur usko aisa lagta hai ki koi usko bula raha hai. Magar yeh baat usne aaj tak kisi ko nahi bataayi, apne mann mein hi rakhi. Aur Priya ka dil toh karta hai waha per wapas jaane ka, lekin woh majboor hai, nahi jaa sakti hai, kyunki ab Priya ki bhi family hai — Rohan aur Ishita.

Aaj bhi woh ghar khali hai. Log waha per rehne ke liye aate toh hain, lekin bas kuch hafton ke liye, sab isliye kyunki jitne bhi log aate, bas ek hi baat bolte the ki "upar wale kamre se koi bulata hai." Kuch log kehte hain ki unhone khidki se ek chhaya dekhi jo seedhiyon par khadi rehti hai, kabhi upar toh kabhi neeche, jaise kisi ka intezaar kar rahi ho. Lekin sach yeh hai ki woh kisi ko bhi nahi bulati, woh sirf ek hi awaaz sunna chahti hai — apni beti ki.

Aur agar kabhi Rajpura ki us gali se guzrein aur koi aurat teen baje raat ko dheemi awaaz mein gaana gaate sunayi de, toh samajh lena woh abhi bhi intezaar kar rahi hai. Aur ho sake toh apni saans roke rakhna, kyunki us ghar ki deewarein aaj bhi saans leti hain, bilkul unki tarah jo kabhi waha rehte the.

Agar aapko ye kahani pasand aayi toh COMICDARKFILE ke WhatsApp Channel ko join karna na bhoolein — aur agli khaufnaak kahani ke liye judte rahiye.