FLAT NO. 404: PADOSI JO SIRF RAAT KO DIKHTA THA

Ek Khaufnaak Hindi Horror Story

Kabhi kabhi aap logon ne dekha hoga ki jo log hamare saath rehte hain, hum unke baare mein kuch nahi jaante, ya woh log hamare baare mein kuch nahi jaante. Lekin dono ko pata hota hai ki unki life mein zaroor kuch na kuch galat chal raha hoga, ya woh kis dard mein apni life guzar rahe hain.

Lekin socho, ek din aisa hota hai ki jis flat mein aap rehte ho, us flat ke saamne wala aapse ekdum se kuch zyada hi close hone lage, jaise baatein karna, apni pareshaniyan batana, aur roz raat ko jaise hi aap job se ghar aao, woh aapke gate par aake khada ho jaaye. Toh aap usko normal padosi samjhoge, ya phir kuch gadbad lagegi. But phir aap jab is cheez ko ignore karke aage badhoge, toh aapko pata chalega ki jo tumhare paas roz baat karne ke liye aata hai, woh hi aapka padosi, aaj se 8 saal pehle mar chuka hai.

Naya Ghar, Purana Raaz

Yeh kahani kisi aur ki nahi, balki Raghav naam ke ek ladke ki hai, jo is shehar mein naya aaya tha apni life ki new starting karne. Raghav ki age 27 saal thi. Uski job ek private company mein lagi thi, toh usko ek aisa flat chahiye tha jo uske office se bhi paas ho aur flat uske budget mein fit ho jaaye. Aise hi usne kai dino tak flat search kiya. Jab jaake usko ek flat pasand aaya, Shanti Residency mein. Building ka construction zyada naya bhi nahi tha, but ek toh building ka naam, aur woh andar se saaf thi. Lekin lift purani thi, corridor ki lights kabhi kabhi bina kisi wajah ke blink karti rehti thi. Ab koi bhi in sab baaton ko normal hi samjhega, aur waise hi bilkul Raghav ne bhi in sab cheezon ko normal hi samjha. Us building mein fourth floor par flat khaali tha, flat number 403, aur theek uske saamne tha 404. But jis din Raghav wahan shift hua, usne dekha ki flat no. 404 band hai, aur flat ka gate bhi bahut purana sa ho raha tha, jaise bahut din se kisi ne usko open hi nahi kiya ho. Gate ke baahar ek name plate thi, jispe naam likha tha: M. SHARMA

Raghav ne in sab cheezon ko ignore kiya aur socha ki koi badi umar ka aadmi rehta hoga. Usne apna samaan andar rakha aur apna room set kar liya.

Ab Raghav khana khakar apne bistar par leta hua tha, tabhi raat ke 11 baje uske gate par dastak hui. Thak... thak... thak...

Usne gate khola toh dekha ki ek aadmi bahar khada hai. Umar lagbhag 60 se 70 saal ke beech hogi. Buzurg aadmi ne Raghav se poochha, "Beta, kya tum yahan naye aaye ho?"

"Ji uncle, main aaj hi shift hua hoon yahan."

"Beta, mera naam Mahesh Sharma hai. Main tumhare saamne wale flat mein hi rehta hoon, no. 404. Tumko kabhi bhi kisi cheez ki zaroorat ho toh batana, main tumhari help kar dunga."

"But Mahesh Sharma ne Raghav ko bola, beta, yahan raat ko kuch ajeeb sa active bhi ho toh tum dhyan rakhna. Lekin tumko us cheez ki aadat ho jayegi, jaise mujhe ho gayi hai, itne time se jo yahan rehta hoon."

Raghav ne haste hue poochha, "Uncle, ek baat batao, aap itne dare hue kyun lag rahe ho? Mujhe sab theek hai na?"

Mahesh ne zyada kuch nahi bola, bas itna bola, "Beta, agar raat mein tumko awaaz de toh pehle dekh lena ki woh awaaz kahan se aa rahi hai." Bas itna bolkar woh apne flat mein chale gaye. Raghav ne bhi apna gate band kiya aur aaram se so gaya.

Lekin use kya pata tha ki agle kuch din uski life badalne wale the.

Raat 2 Baje Wala Padosi

Aise hi kuch din sab normal raha. Raghav subah office jaata, shaam ko ghar aata, aur kabhi kabhi building mein usko Mahesh Sharma bhi mil jaate the. Lekin woh kabhi usse baat nahi karte the, hamesha shaant rehte the. Par Raghav ko ek baat ajeeb lagi ki usne unko kabhi bhi morning mein nahi dekha tha, aur na hi dopahar mein. Woh usko bas raat mein hi dikhte the.

Ek raat Raghav apne office ka kaam kar raha tha. Us din kaam kafi ho gaya tha, toh karib raat ke 2 baj rahe the. Tabhi Raghav ko awaaz aayi, jaise koi uske gate par aake knock kar raha ho. Jab usne darwaza khola, toh wahan aur koi nahi, Mahesh Sharma hi the. Woh pareshaan sa lag raha tha. Usne poochha, "Beta, kya tumne meri beti ko dekha hai?"

Raghav ne kaha, "Uncle, aapki beti bhi hai? Aur woh aapke saath rehti hai, par aapne toh yeh kabhi bataya nahi. Aur maine usko yahan kabhi nahi dekha hai."

Mahesh ne jawab diya, "Haan beta. Woh ghar se bahar gayi thi, lekin abhi tak wapas nahi aayi."

Raghav ne corridor mein dekha. Wahan koi nahi tha.

Usne kaha, "Uncle, aap society ke guard ko batao. Shayad woh bahar gayi ho."

Mahesh Sharma rone lage aur bolne lage, "Meri beti choti hai, zyada samajhdar nahi hai." Raghav ne poochha, "Uncle, aapki beti ka naam kya hai?" Mahesh ne jawab diya, "Meri beti ka naam hai Meera." Bas itna bola, aur pata nahi kyun, woh ekdum se apne flat mein wapas chale gaye.

Ab Raghav ke dimaag mein bas yeh hi baat chal rahi thi ki itni raat ko koi buzurg aadmi apni beti ko kyun dhoondh raha hai? Aur agar aisa hai bhi, toh usne bas mujhe hi kyun bataya, kisi aur ko kyun nahi bataya? Raghav ne socha ki subah uncle se is baare mein baat karega.

Lekin agli subah jab woh office jaane ke liye nikla, toh saamne wale flat ka darwaza band tha. Usne bell bajayi. Lekin koi nahi aaya. Usne dobara bell bajayi. Phir bhi koi nahi.

Building Ke Guard Ne Jo Bataya

Shaam ko Raghav ghar laut raha tha, tab uski mulaqat building ke guard Suresh se hui. Suresh kareeb 50 saal ka aadmi tha aur kai saalon se us building mein kaam kar raha tha.

Raghav ne casual andaaz mein poochha, "Bhaiya, fourth floor par mere saamne jo uncle rehte hain, unka naam Mahesh Sharma hai na?"

Suresh ke chehre ka rang badal gaya. "Kaun uncle?"

"Arre, flat 404 wale. Safed kurta pehente hain. Kal raat bhi mile the."

Suresh kuch seconds tak Raghav ko dekhta raha. Phir bola, "Sahab, aap mazaak toh nahi kar rahe?"

"Mazaak kyun karunga?"

Suresh ne apni kursi se uthkar dheere se kaha, "Flat 404 mein 8 saal se koi nahi rehta."

Raghav hans diya. "Aisa kaise ho sakta hai? Main unse kal raat hi baat karke aaya hoon."

Suresh ne aas paas dekha, phir usse apne paas bulaya. "Sahab, aapko us flat ke baare mein kuch pata hai? Jinki aap baat kar rahe ho, us flat mein 8 saal pehle ek aadmi rehta tha, apni beti ke saath. Beti ka naam tha Meera, aur uska khud ka naam tha Mahesh Sharma."

Raghav ab chup hokar Suresh ki baat sun raha tha. Suresh ne bataya, "Ek raat us flat mein aag lag gayi thi. Logon ne bahut koshish ki, lekin Mahesh Sharma aur unki beti ko bachaya nahi ja saka."

Raghav ka gala sookh gaya. "Lekin unki death kab hui thi?"

"Aaj se aath saal pehle, sahab. Usi din jis din aap is building mein shift hue the."

Raghav ne turant kaha, "Nahi, aisa ho hi nahi sakta. Maine kal hi unse mila tha, unhone mujhse baat bhi ki hai."

Suresh ne Raghav ka haath pakad liya. "Sahab, meri baat dhyan se suno. Agar raat mein flat 404 se koi awaaz aaye, toh udhar bilkul bhi mat jaana."

Phir Suresh ne purana register khola aur Raghav ko dikhaya. Usme Raghav ki shift date aur Mahesh ke saath woh haadsa, dono ki date bilkul same thi. Aur Suresh ne us register mein ek entry aur dikhayi: aath saal pehle bhi ek ladka isi flat mein aaya tha, uska naam bhi Raghav tha, aur usi raat aag lagi thi. Us din ke baad se us flat ka gate kisi ne nahi khola tha.

Raghav himmat karke upar gaya, aur jaise-taise flat 404 mein jhaankkar dekha. Wahan ek purani photo thi, Mahesh Sharma ki. Ab Raghav apne phone par is news ke baare mein Google par search karne laga. Kaafi dhoondhne ke baad usko ek local news ki report mili. Headline thi: RESIDENTIAL BUILDING FIRE CLAIMS TWO LIVES. Report dekhi, toh woh 8 saal purani thi.

Woh Tasveer Jisne Sab Badal Diya

Report ke andar likha tha ki Shanti Residency ke fourth floor par aag lagne se ek buzurg aadmi aur uski beti ki jaan chali gayi thi. Report mein yeh bhi likha hua tha ki ek ladka bhi tha, jisko log unka padosi bata rahe the. Woh ladka bhi wahin phans gaya tha, jab woh un dono baap aur beti ki jaan bacha raha tha, lekin use time par nikal liya gaya tha, aur woh kuch din baad hospital mein khatam ho gaya.

Report ke andar bhi ek photo thi, aur woh kisi aur ki nahi, balki Mahesh Sharma ki hi thi. Lekin Raghav ko ab bhi ek baat samajh nahi aa rahi thi, woh tisra ladka kaun tha jo wahan dhuein mein phansa hua tha, aur uska connection Raghav se kaise tha? Yeh sab kuch uske dimaag mein chal raha tha, kyunki jis building mein Raghav kuch din pehle hi aaya tha, us building mein uske naam se 8 saal pehle ki entry thi, aur yeh cheez usne khud dekhi. Raghav ne apne company ka offer letter nikala. Usme bhi wahi 8 saal pehle ki date thi. Office ki mail par bhi same date, 8 saal pehle ki. Aur address bhi likha tha: Flat no. 403, Shanti Residency. Itna sab hone ke baad Raghav pehle se hi dara hua tha, tabhi raat ko usne corridor se ek choti bachchi ke rone ki awaaz suni.

Darwaze Ke Bahar Ki Awaaz

Raghav ne uthkar darwaze ke peephole se dekha. Corridor khaali thi, lekin phir achanak se ek awaaz aayi,

"Papa... mujhe darr lag raha hai."

Raghav awaaz sunkar darr gaya, lekin usne himmat karke dobara dekha. Toh 404 ke saamne ek chhoti bachchi khadi thi, pink frock mein, bikhre baal, aur chehre par jalne ke nishan. Raghav ne kaanpti awaaz mein poochha, "Kya tum Meera ho?" Ladki ne sar uthaya aur Raghav se poochha, "Bhaiya, papa ne bataya tha ki aap us raat hum sab ko bachane aaye the. Aap aaj bhi humare saath ho na?"

"Bhaiya, aap ghabraiye mat. Papa aapka hi intezaar kar rahe the, kyunki aapne us raat hum sab ko bachane ki koshish ki thi. Lekin aapka pair phisal gaya tha aur aap gir kar behosh ho gaye the, aur phir aap achanak gayab ho gaye. Uske baad humne aapko 8 saal baad dekha hai."

Raghav ne dekha ki uske bed par ek book rakhi hui thi, jismein ek purani photo rakhi thi, jo phati-phati thi, ya usse bhi zyada Raghav jaisi lag rahi thi.

Meera ne kaha, "Papa kehte hain ki jo is ghar se nikalne ki koshish karta hai, yeh ghar kisi na kisi tarah use wapas yahin khinch leta hai, jaise ab aapko 8 saal baad wapas laaya hai."

Lift Ka Sheesha

Yeh sab sun kar Raghav darr gaya aur seedha lift ki taraf bhaga. Lift ke andar ek purana sheesha laga hua tha. Jab usne waha apna chehra dekha, toh usme uska chehra jala hua dikha, kapde kaale aur phate hue the. Woh aur darr gaya, usne apni aankhen band kar li. Kuch der baad jab usne dobara aankhen kholi, toh woh dekhta hai ki lift ke sheeshe mein sab normal tha, uska chehra bhi, aur wahi purani deewar bhi. Lekin jab lift ka darwaza khula, toh Meera wahin khadi thi, corridor mein.

"Bhaiya, aap mere saath chalo, dada ji aur papa aapka wait kar rahe hain."

Raghav jaise ab khud ke control mein nahi tha, woh Meera ke saath chala gaya, lekin phir kabhi wahan se wapas nahi aaya.

Aakhri Sach

Lekin phir subah hui, building ki lift dobara start hui, aur fourth floor par ek young ladka aaya. Uske haath mein flat ke documents the, flat no. 403. Woh ladka kuch der flat 404 ke saamne ruka, nameplate dekhi, aur phir apne flat mein chala gaya.

Ab raat ko, theek 11 baje, uske darwaze par koi aaya.

Thak... thak... thak...

Aur ek buzurg aadmi safed kurte mein muskurate hue bole, "Beta, naye aaye ho?" Woh buzurg aadmi aur koi nahi, Mahesh Sharma hi the.

Agar aapko yeh kahani pasand aayi, toh COMICDARKFILE ke WhatsApp Channel ko join karna na bhoolein, aur agli khaufnaak kahani ke liye judte rahiye.

Comments

Popular Posts