Zindagi Ka Faisla in Hindi

Zindagi Ka Faisla

Riya, jo ki ek kiraye ke kamre mein apne pati Aryan ke sath rehti thi. Subah jab woh apne ghar par wapas lauti, toh Aryan ne koi jawab nahi diya. Kaafi der se wahi ghar ke bahar khadi rahi. Riya ne padosi ko bolkar gate tudwaya. Unhone dekha ki Aryan ki death ho chuki thi.

Kya ye bas ek accidental maut hui thi, ya phir kisi ne uska murder kiya? Chalo ab aage ki story mein padhte hain Riya aur Aryan ki incomplete love story.

Riya Ki Zindagi

Riya ek divorced lady thi jiske 2 bache bhi the aur woh ek MNC company mein working thi. Uske pati ko uska job karna sahi nahi lagta tha aur woh uske upar bahut shak karta tha. Lekin Riya bolti thi, "Maine itni padhai kari hai, koi ghar par baithne ke liye thodi na ki hai. Mujhe job karni hai."

Toh in sab baaton ki wajah se dono mein aapas mein kabhi nahi bani. Dono ne decide kiya hum dono divorce le lenge. Court ne divorce dete time bachon ki custody Riya ko handover kari thi. Toh dono bache Riya ke sath hi rehte the.

Aryan Se Mulaqat

Riya apni normal life jeene lagi, job par jaane lagi. Aise hi ek din uski mulaqat Aryan se hui. Woh bhi usi company mein new joining par aaya tha. Riya usko training de rahi thi. Dono ki baat hone lagi. Mahine guzare, 1 saal ho gaya. Dono ko laga ki shayad hum ek dusre se pyaar karte hain.

Aryan ne ek din Riya ko bol hi diya, "Main tumse pyaar karta hoon." Aur Riya ne uska proposal accept kiya aur usse kaha, "Shayad agar kuch din mein tum ye baat mujhse nahi karte, toh main khud tumse bolne wali thi." Dono sath mein khush rehne lage.

Rohan — Puraana Dost

Ek din Riya ki mulaqat Rohan se hoti hai. Rohan aur Riya dono school friend the. Rohan kahin na kahin Riya ko pasand karta tha. College time ki baat hai — Rohan ne Riya ko propose kiya tha, lekin usne mana kar diya tha, kyunki woh Rohan ko ek achha dost maanti thi, bas uske alawa aur kuch nahi.

Ye baat kahin na kahin Rohan ko hurt hui, kyunki Rohan uske liye sab kuch karta tha jo bhi Riya ko pasand tha. Phir dono ki baat-cheet kam ho gayi. College complete hua aur jab Rohan ko pata chala ki Riya ki shaadi hone wali hai, toh woh ekdam se kahin gayab ho gaya. Aisa Riya ko laga tha, lekin Rohan uske aas-paas hi rehta tha. Aur jab uska divorce hua, toh sabse zyada khush shayad Rohan hi tha.

Toh Riya ki company mein join karna aur uske saamne ekdam se aana, ye sab uska plan tha. Lekin usko Aryan ke baare mein nahi pata tha.

Kuch din baad Rohan ne Riya ko dobara propose kiya, "Main tumko khush rakhunga. Main tumhare bachon ko bhi apne sath rakh lunga." Lekin Riya ne usko mana kar diya ye kehkar, "Mera pehle se hi ek boyfriend hai aur main usse jaldi hi shaadi karne wali hoon. Uska naam Aryan hai. Mere sath hi kaam karta hai. So please, tum mera peecha chhod do."

Bas itna bolkar Riya chali gayi. Lekin Rohan ko ye baat bilkul pasand nahi aayi. Ye sunkar woh pagal sa ho gaya. Woh sochne laga — mere andar aisi kya kami hai jo usne mujhe chhodkar uske sath rehne ka decide kiya.

Shaadi Aur Family Ka Virodh

Ab Aryan aur Riya ko sath rehte rehte kaafi time ho gaya. Toh dono ne apni family se baat kari is baare mein ki hum dono ek dusre se pyaar karte hain aur hume shaadi karni hai. Riya ki family toh maan gayi, lekin Aryan ki family ne saaf mana kar diya ki hum ye rishta bilkul nahi hone denge, kyunki Riya ke 2 bache hain aur woh ek divorced lady hai.

Dono ne phir decision liya ki hum bhaag kar court marriage kar lete hain. Dono ne waise hi kiya. Ek jagah flat lekar dono sath-sath mein rehne lage, khushi-khushi. Lekin Aryan ki family ko us par shak hone laga, kyunki woh ghar nahi aata tha aur raat-raat bhar bahar rehta tha. Toh ek din jab usse pucha, toh usne apni family ko bata diya ki maine aur Riya ne bhaag kar shaadi kar li hai.

Woh Bhayanak Subah

Pehle toh usko ghar se bahar nikal diya family ne, lekin kuch time baad decide hua ki hum tum dono ko accept kar lenge aur ek chhota sa function rakhenge. Jab sab kuch achha chal raha tha, toh ek din jab Riya office se ghar aayi, toh usne kuch aisa dekha jiske baare mein usne kabhi socha bhi nahi tha.

Pehle usne gate kholne ke liye bell bajayi, lekin koi response nahi aaya. Kaafi time ho gaya. Usko dar lag raha tha, kyunki Aryan bas akela hi ghar par tha. Us time bache bhi apni nani ke ghar par the. Riya ne direct police station phone kiya. Police wale aaye aur gate ko tudwaya. Toh unhone dekha ki Aryan fan ke upar latka hua tha.

Riya ye dekh kar behosh ho gayi. Phir jab usko hosh aaya, toh woh rone lagi ki ye sab kya ho gaya. Apne aap ko dosh dene lagi ki main office kyun gayi, mujhe ghar par hi rehna chahiye tha. Ab Aryan ki family wale aaye, toh woh bhi Riya ke upar hi ilzaam lagane lage ki "hamare bete ko ye pareshan karti hogi, usne hi aisa kiya hai, warna hamara ladka kabhi aisa nahi kar sakta."

Postmortem Report Mein Bada Khulasa

Ab police ne body ko postmortem ke liye bhej diya aur jab report aayi, toh usme aaya ki ye koi suicide nahi, balki ek murder hai. Police ka shak sabse pehle Aryan ki khud ki family par gaya, kyunki uski family is shaadi ke khilaaf thi.

Lekin jab CCTV dekha aur aas-paas ke logon se pucha, toh unhone bataya ki humne ek aadmi ko ghar mein jaate dekha tha. CCTV mein bhi usi time ke aas-paas woh aadmi andar gaya tha.

Number nikala gaya, toh woh Rohan ke kisi rishtedar ki ID se liya gaya tha, jisko Riya jaanti thi. Jab ye baat Riya ko pata chali, toh turant Riya ne police ko bataya ki ye kaam Rohan ka ho sakta hai, kyunki woh mujhse pyaar karta tha. Lekin maine usko hamesha mana kar diya tha. Last time jab woh mujhse mila tha, toh maine usko kuch zyada bola tha aur Aryan ke baare mein bhi bataya tha.

Rohan Ki Giraftari

Phir police Rohan ke ghar par gayi, toh Rohan wahan se gayab tha. Phir uske number se usko trace kiya gaya. Police ne usko pakda aur Rohan ne khud apna ye gunah kabool kiya. Usne bataya ki woh Aryan ko bilkul pasand nahi karta tha. Usko aisa lagta tha jaise Riya Aryan ke sath bilkul khush nahi hai, bas zabardasti apne bachon ke liye uske sath rehti hai.

Kahani Ka Ant

Ab ye sab kuch sunkar Aryan ki family bhi sharminda thi aur sochne lagi ki shayad humne pehle hi is rishte ko maan liya hota, toh hamara beta aaj zinda hota. Uske baad Rohan ko umar qaid ki saza hui. Rohan ne apne sath-sath 5 logon ki life kharab kari — Aryan, Riya, uske 2 bache aur apni khud ki bhi.

Shayad is haadse ko sab ek din bhool jayenge, lekin Riya par Aryan ke aise chale jaane ka asar hamesha hi rahega, kyunki woh ek aisa insaan tha jiske aane ke baad Riya apni life mein khush rehne lagi thi. Lekin uske sath galat hua.

Riya ne is haadse se sikha ki kabhi-kabhi jo aapki life ka ek achha dost hota hai, wahi aapki life kharab kar deta hai. Ab Riya bas apne bachon ke sath rehti hai aur kahin na kahin apne bachon ke liye hi zinda hai.